وحدِي كِنِتْ سَهْران تأمَّلِ النِجمات
شِفْت القَمَرْ وَلْهانْ مِنْ طَرْفْ نَظْراتو،
ناصِب شباكُو مخَبّى ورَى الغيمات
صالِي تَنِجْمي تِعلَق بقِضبان دِبقاتُو
قَلِّي نِسهر سوى بِسكون هالعتمات
ونِنْدَه نِجُوم السَما من خلف غيماتو
والليل نسهر معو ونْطَوِّلِ السهرات
وْنُنْسُجْ قَصَايِدْ غَزَلْ تَتحِنْ نِجماتو
وْنُمْخُرْ بُحورْ الشِعِرْ ونْسابِقْ الأبيات
والقَلَمْ يُعْزُف صُوَر عانْغَام ابياتو
والوَرَقْ عِنْدو ضَمَأْ تيِشْرَبْ الحِبْرات
ويُنْظُم قَصِيدي من وَجَعْ حِبْراتو
والهوى ينَسِّم عليلو من حَرْقِة اللهفات
ويبعث رسايل حُبْ عَجْناح دمعاتو
ولَمَّا رِياحو تهِبْ بِتْسَرِّعِ النَبْضَات
بيصير القلب يِضْرُب وِتْزِيد دقَّاتو
وْلَمَّا الفٓجِرْ بِي طُلْ وِالنَدى حَبَّات
والدِّيك يِصْحَى ويِصدَّح بِصَيْحاتو
والورد يْفَوِّحْ عُطُر تَيغازِلِ النحلات
بَلكي يجيبوا العسل طَيِّب بِنَكْهاتو
وصوت الحساسين بِتدَّوْزِن النَغمات
والدُّوري بيِسْعى شَقَا لَيْضُبْ قَشَّاتو
والبحر مَدّ ًوْجَزِرْ تيحرِّك المَوْجَات
والنَّهِرْ تِسْمَعْ خَريرو عَطْراف ضَفَّاتو
والشَّمْس تِشْرُقْ فَرَح أنوارها مْرَايات
وِخْيوطْها حبَال الذَهَب مربوطة بِتَلاّتو
وقَدَّيْش بي هَالكَوْن موجُودْ مَخْلوقات
سبحان هالخالق شُو مُبدِّع بآياتو
جمال طنانا
