لبنان: 96171010310+     ديربورن: 13137751171+ | 13136996923+
2,165 مشاهدة
A+ A-

بمتل هيدا اليوم ومن هيدا البيت بزقاق البلاط بلشت حكاية بنت وقمر أخضر، كان يلفي عليها وتقلوا "لبعيد بعدني" وما كانت عارفة انه هالأمنيات المستحيلة بتتحقق.

 هالبنت لـ بين القناطر، كتبت حكاية بلشت بـ "كان يا ما كان" وما خلصت بـ" أنا صار لازم ودعكن".

نهاد وديع حداد أو "فيروز"، الاسم الوحيد لاتفقوا عليه اللبنانيين بدون "واسطة" أو تدخل من الخارج.

البنت الغيرانة والـ "مش فارقة معها"، لــ "عم تطلع عالشجرة" وتنزل ع ساحة ميس الريم، البياعة والملكة.. صوت الصبح والمسا والبلاد لما سمع فيها حدا.

غنت لـ لبنان بشماله وجنوبه، لسوريا ودمشق، لمصر ومكة وبغداد وصولاً لـ باريس.. ما كانت بحاجة لا للملوك ولا للزعما لتوصل لكل الشعوب، وخصوصاً "المعترين" لأن المعتر بكل الأرض دايماً هو ذاته.

أما حكايتها مع فلسطين، ما بتنحكى بسطرين.. هي اللي مشيت بشوارع القدس العتيقة وأخدتنا معها.

هي الأم والإنسانة لانحطت بحبس الرسميات وبـ هالة ممنوع تطلع منها.  

فقدت بنتها ليال ع بكير وندرت حياتها لـ هلي، كانت حد رفيق عمرها عاصي الرحباني عالحلوة والمرّة وللحظة الأخيرة... هي مش من عالم تاني، حكايتها بتشبه حكاياتنا.

هي المرحة حسب المقربين والخجولة بكتير مطارح، واللي حملت هموم كتار وأولهن أنّها لبنان اللي منحبو وصورتنا الحلوة عنه. لبنان اللي منهرب من العيشة فيه وفيروز اللي بتخبينا بصوتها لنحس انه بعد عنا وطن.

صوتها لكان بعز الحرب الأهلية يقطع المتاريس ويكزدر بين الشوارع بدون ما يتقنص، الوحيد لبعدو بيقطع معنا من بلد لبلد وجيل لجيل، من أزمة لأزمة ومن حب لحب.

وحبها مخلي الكتار يبرموا بالشوارع ليفتشوا عن مطرح عاشت فيه أو حيّدت صوبه، بيحمل ولو اسمها  أو تفصيل من تفاصيلها.. ينكشوا عن غنية مش معروفة كتير ومقابلة كانت بعدها بتحكي فيها بعد أكتر بكتير.

اليوم بعيدك، مش رح نخبرك قديش منحبك لأن انت لقلتي العواطف بتنحس ما بتنقال.. اليوم بس رح نصلي ونندر شموع لتعيشي لأن العمر بيلبقلك حتى بالخفا وبصورة بتخبرنا عن حالك بتغششنا فيها ريما، نخبر ولادنا عنك عند كل حوّرة وخلف كل باب، بقلب كل حي وع كل جبل... بالشتي والصيف وحتى بأيام الخريف.. نخبرهن عن حلوة ما بتعرف انها هلقد حلوة.

زينب بزي - بنت جبيل. أورغ


تغطية مباشرة آخر الأخبار

  • دولار​ السوق السودا​ء يسجل ما بين​​​​​​ 41250 - 41350 ليرة لبنانية
  • الرئيس بري يرفع جلسة انتخاب رئيس الجمهورية إلى الخميس المقبل
  • نال النائب ميشال معوّض 37 صوتًا وعصام خليفة 4 أصوت وزياد بارود صوتين وصوت لـ بشارة أبي يونس وصوت "لولا دا سيلفا" فيما اقترع 52 نائبًا بالورقة البيضاء وألغيت 16 ورقة خلال الجلسة لانتخاب رئيس للجمهورية
  • بدء الجلسة الثامنة لانتخاب رئيس للجمهورية