ريما الرحباني تنتقد تسمية طريق المطار باسم "جادة زياد الرحباني": شو خص زياد بطريق المطار؟

كتبت المخرجة والكاتبة ريما الرحباني في منشور عبر صفحتها على فايسبوك:

ترَكني عا الأرض ورااااحْ، راحْ
وما قلّي شو بِقدر أعمِل
تا إمشي، وتا كفّي الطريقْ!
اليوم بهالنهار بالذات حابّة إشكُر صوت الشعب على التحيّة اللي عملوها لزياد وقلّن مش من شي قليل كان زياد يِعتبر هالإذاعة بيتو لأنّها بتِشبَهو، بالنهاية هيّي لبنانية، والمفروض كان كل اللبنانية يكونوا فعلا تعلّموا شي منّو خاصّة إذا إدّعوا إنّهن بيحبُّوه.
أمّا الشكر الأكبر والتحيّة منّي، هيّي لمدير المركز الثقافي الروسي اللي هوّي طبعاً روسي ومش لبناني، إنّما فاهم زياد وقيمة زياد وإرث زياد أكتر من مُعظم اللبنانيّة. مش من شي قليل بحِب روسيا وبحِب بوتين وبحِب الروس!
الكلمة اللي قالا مدير البيت الروسي عن زياد يا ريت الفعاليّات على أنواعا المدّعية التكريم تسمعا وتتعلّم وإذا ما بدّا تتعلَّم بالقليلة تِفهم! هيدا الزلمة حِكي الصح بيدون ما أعرفو وبيدون ما إتعاطى معو،
حكي الصَّح لأنّو شعب من أساسو بيخلق وبيِربى صِح
شكراً روسيا شكراً بوتين شكراً البيت الروسي
كلمة الكسندر أناتوليفيتش سوروكين مدير البيت الروسي قال رح يحكي كلمة مختصرة لأن، ”هَل يُمكن للكلمات الطويلة أصلاً أن تَختصِر عَظمة الرحباني! إنَّ إرثه يتحدَّث عن نفسِهِ بصوت أعلى وأكثر صِدقاً وحكمةً من أي خطاب رسمي.“ وحكي كلام أجمل وأصدق وأعمق ما قيل عن زياد، ورِجع خَتم، ”أُكرّر أنّني لا أدّعي القدرة على قول كل شيء عنه، فهذا أمر مُستحيل، لذلك ومن الحِكمة أن نَترك الكلمة لفنِّهِ فهُو أفضَل منّا للحديث عنه.“
عرفتوا كيف؟ ايه من الحِكمة تعرفوا كيف.
أمّا دولتنا العجيبة آآآآآآآآخ على هالدولة! يعني شوما عِملت وبأي مجال اللي كان، سياسي أقتصادي او ثقافي ما زابطة معها تما نقول شي تاني، وإذا غلطوا وبدّن يكرّموا، المفروض إجمالاً يكون تكريم! اي بيِطلع العكس تماماً!!
قليلة نقّوا طريق المطار يحطّوا عليها إسم زياد رحباني!!!!! إنّو وَلَوْ!؟ شو خَص زياد بطريق المطار؟ شو جاب لجاب؟ إنّو اذا ولَلْبُد بدّكن تسمّوا طريق عا إسمو، نقّوا شي بيِشبَهو يا ناس!!
مثلاً نزلة الجامعة، حيثُ الإستديو تبعو، نزلة البيكاديللي، حيثُ إشتغل،
طريق الأورلي حيثُ قدّم أوّل عَمل إلو بالحمرا!
شو بدّكُن بطريق المطار!؟ والا بدّكن تِنزعوا إسم الأسد عن الطريق وما عارفين كيف، قِمتوا لزَقتوها لزياد!!!
وهيّي جادّة، بايْ ذُو واي، مش طريق لاااااا جادّة! عم تِحكُوا جادّة!!؟ أكيد عم تِمزحوا!
إنّو مش دفاعاً عن الأسد، بس من الأساس لشو تسمّوها طريق الأسد إذا بدّكن ترجعوا تقشطوه ياها!! سياسة وسخة ومن جميع الأطراف ما عم صِف مع حدا ضِد حدا. بس إحترموا حالكُن ويكون في ثبات بمواقفكُن! تعلّموا الوطنيّة وما تتزلّفوا لفلان وفليتان! بس لاء لا يوجد، لشو عم عذّب حالي..
المُهم بالعودة لطريق المطار ما فهمت ليه نسبتُوها لزياد وما بتِشبهوا بشي!
لو سمّيتوها مثلاً جادّة غسان الرحباني! بيقول الواحد إنّو غسان عِمل غنّية طريق المطار! بس زياد!!!!!!؟؟؟؟؟؟
عن جد دولة فاشلة!
طيّب نازلين كلّكن تقولوا بدّكن تكرّموا وبدّكن تكرّموا فيروز.. وفيروز الرمز وفيروز لبنان.. وهولي الشعارات اللي ما بيفيدوا بشي غير إنّكن تبيّنوا حضاريّين. وبدّكن تكرّموا زياد وزياد العبقري..
بدّكن أعطيكن فكرة للتكريم؟ فيني إذا بدّكن.
فيكُن بدَل ما تاركينّي لوحدي عم قاتِل وخوض حرُوب من عشرين سنة للحِفاظ على هالإرث الفنّي ومنع الكوْن كلّو، مُنفردة، من تشويهو وتخريبو وتزويرو وشايفيني لوحدي عاملة بوليس لازم إنتو تكونوه لأن مش شَغلتي كون بوليس لَو في دولة ولَو في قضاءْ! اللي عم أعملو بالأساس لازم يكون تحصيل حاصل بلا ما أنا إلعب هالدور، لو إنتو دولة! وبنفس الوقت قال مِحتارين كيف تكرّموا فيروز وتكرّموا زياد، حاج تحتاروا واضحة كتير!
بتَعِملوا إرث فيروز والأخوين وإرث زياد خط أحمر عريييييييييييييييض!
وبتِحموه من الإعادة ومن العبث فيه ومن تخريبو وتزويرو وبتحرصوا على نقلو الى الأجيال القادمة كما هو بيدون العَبث فيه، اي بيكون ممنوع التصرُّف فيه على الجميع، بِمَن فيهن الورثة ذات نفسُن، لقاء المُلاحقة الجديّة والقضائيّة وحَبس وتوقيف عن العمل لأي مخلوق تُسوِّله نفسه إنّو يعيد او يمِس بهالأعمال. وبتعملوا هالشي فُور فرِي. لأن واجِبكُن تعملوه، اي بيدون شروط متل صورة مع فيروز او بلاك برعاية ما بعرف أيّة وزير او أيّة نايب، او او او ما بعرف مين فيكن؟ هيدا الأصول وهيدا الحق. لو فيروز والأخوين وزياد خلقوا بمصر او سوريا او فلسطين او الأردن.. كان إختلف الأمر كتير كان حصل هيك حتّى بيدون ما إضطر إحكي، بيدون ما إضطر حارب كل هالسنين اللي ضاعت من عمري، أنا وعم حارب شي المفروض يكون من بديهيّات الحياة أنا وعم كدّس أعداء لا بعرفُن ولا بيعرفوني تغطّي فشلكُن بمُهِمّتكُن، وبيدون ما إضطر حارب محطّات تلفزيون ماسونية عا صهيونية عا سمّاوية عا فاشلة-ويّة هيّي وموظّفينا وفنّانينا وإداريّينا على راسن ميشو. عرفتوا كيف؟ عا كل، ميُو فو تار كو جامِي، هاي فكرة للتكريم لو بتحبّوا فعلاً تكرّموا! وإلا معليه ما حدا يقلّي بدّو يكرّم فيروز.. وفيروز الرمز وزياد العبقري وعاصي عبقرِيَيْن وتزتّوا بهالشعارات الفارغة، لأن الكلام لشو الكلام هيدي حيااااااااااااتي
ريما عاصي فيروز زياد هلي ليال الرحباني
مش عم عدّد أسامي أهلي نو هيدا إمضائي الجديد اوكي؟

---