ريما الرحباني تهاجم المواقف السياسية للقوات: «طبيعي يكونوا مع الشيطان بحد ذاتو؟ كيف فيهن يكونوا هلقد مش معنيين باللي عم يصير بالجنوب؟»

كتب المخرجة ريما الرحباني عبر حسابها على فايسبوك:
صباح النور والخير والخيرات
هيدا بوست إستَجَد بعدما قريت بعض التعليقات خاصة القوّاتية عالبوست اللي قبلو
انا كنت متوقّعة هيك شي بس مش هيك نوع ألفاظ خالية كلّيا من الأدب! خالية من المنطِق إي توقّعتا بس من الأدب ما كتير توقّعتا خاصة وإنّي مش مهاجمة حدا، انا قايلة شو بحِب بَس! ممنوع حِبْ؟ آخ يا الله! مِتِت ضحك! ولَهَيْك حابّة تكتِك فيكُن وبِ إم سليمان، مش فرنجيّة أكيد، لَه سليمان الغنّية!
وعلى فكرة رح إغتِنم المُناسبة تا قلّكن عن حالي وعن باقي البوستات اللي تقريباً كلّكن بتِعتِبروها هُجوميّة وإنّي مَسمُومة انا وعَم قولا! إجا الوقت يا حلوين خبّركُن أنو لا بكون مسمومة ولا بكون شي! إنّما بحِب تكتِك! هوايتِي المُفضّلة بالحياة، تَكتِك، الى جانِب البيسيكليت والتينس! التَكتَكة! جاااادووووووووغ
سا ماموز إنورميمان وي!
فلمّا يكون في شي أمّورة أو طَبُّولة او أي حاغَة مغِنَّايي لفيروز وصاعْقَة علينا من كل حدبٍٍ وصَوب، نشاز وشواز ونازلة فَتْك بهَالإِرث انشالله مفكّريني بس رِد وإملِشْها بكون عم إتْسَمسَم؟ لا والله بكون بقِمّة البَهجِة وخاصةً إذا عِندا ولَيْدات تِفلِتُن عليّي بالتعليقات! جادووووووووغ
ولمّا جاوِب الطَبْل كُلِّ سنة مرّة، انشالله ببالكُن بكون زِعلانة ومَقهُورة؟!؟
بكون ميّتة ضحك أنا وعم إكتُب وبعدما إكتُب وبعدما يِهجُم الكُورال بتاعو اللي محفّظو شو يقول!
جااااادووووووووووغ
وهلُّم جَرَّ عا كل المواضِيع إعرَفوا شي أنا ليبرا وال ليبرا دينُو ومَعبُودو يحِط النِقَط عالحُروف بكِل ثبَات وثِقَة وراحَة وضِحك قدّما بَدّكُن وواثِق مَعو الحَق والحَق سَاااا ينتَصِر! إنتَهِت الملاحظة! فا لمّا تشُوفوا بوكس جديد إعرَفوا إنّي بكون بقمّة السعادة والفرَح والبَهجة! وإنبسطولي!
هلق اكيد عا أثر هالخبريّة رح تقولوا لنَفسكُن، طيب شو اللي بِيعَصّبا لَكَن!! كمان رح قِلّكُن تا تِرتاحُوا!
بعَصّب من زلمة الآي سي إذا قلّي جايي ٤ وما إجا لل ٨ أو ما إجا بالمَرّة
بعَصّب إذا واحد مِشِي عالإشارة الحَمرا أو زَتْ من الشِبّاك زبالتو
بعَصّب إذا واقفين بالصف وشَكْ قبِلنا واحد مِعتِقِد حالو كتييييير مهِمْ وما بيِقدِر يوَسّخ حالو بيناتنا نحنا الشعب العادي! وينطُر!
بعَصّب إذا حكيم غِلِط او إِستَلشأ بِ حدا، هون بيبَلّش لِيفِلْ تُعصِيب عا بأَجْرِم يعني الحمدالله ما بكون حاملة سلاح، لأن بِقدر بلَحظِتا، بكِل ريَاحِة ضَمير قَوّص!
بعَصّب اذا شَب بعِرفُو او ما بعرفو، أسود إستَقْوُوا عليه البيض الأنجاسْ هيكي!
بس غير هيكي ولا شي بيهِزّني لو شو ما كان كبير ومَصيري، لأن واثقة إنّو قَضِيتي مُحِقّة وسَوْف أنتَصِر، إذا مِش بُكرا البَعدو أكيد، ورَح توقَع الوُجوه المَصبُوغة لا مَحَال!
بون، سوسِّي دي، تا نرجع لقُوّاتْنا لي بُوفْرْ!
يا عمّي ليه إنتو هيْك؟ ليه ليه ليه؟ لَيْشْكُن بُورنيه لهَالدَرجة!؟ ما معقول ولُوه! يعني بس فسّرولي كيف مُمكِن تِبنُوا وَطَن كِلّو قُوّات؟ شِنُوه هالوَطن؟ مين بيِقعُد فيه غَيركُن؟ مَعقُولة؟ بشير ما كان هَيك مِش معلّمكُن بشير؟! اي اوكي ما كان هيك! كان صاحب شعار ال ١٠٤٥٢كم مربّع! شه! هلّق إبنو المِسكين هَيْك مِتِلكُن يعني، بس إبنو مش إمتِداد لبيّو ابداً حرام! إنتبهوا انا بحِبّو كتير لنَديم لأن بيمَوّتني ضِحِك، وكِل أصحَابي بيعِرفوا لمّا كُون مضَايقة وبدُّن يضَحكُوني ما بيشِيلنِي إلا نديم! بيِبعَتولي تِصريح إلو بضل عيدو وإضحَك تا إبرِيه! معقول العِناية الفَاقْعَة؟ ما تقولولي!! ولا يُمكن ولا أي كومّيدي مَهما علا شَأنُو يضَحِّكني قد هاي الجِملة! وإنتِبْهُوا مع الأتِّيتُود تَبَعو هُو وعَم يقولا طبعاً وقابِض حالو جَدْ!! آخ يا الله!! بار كُونْتر لَوْ يُمنَى مِستِلمة القوّات كان غير موضوع! يُمنى وِي! اللي ما رح يخلُّوها توصَل لأن أفكارا بَشِيريّة ووطنيّة، الشي اللي ما بدُّن ياه. أنّو باردُون يعني، تا نِرجَع لموضُوعنا، بس تسِبُّوني او تسِبُّوا عبد الغني عندي، شو إنّو بتِرتاحوا؟ انا باقية وعبد الغني باقي، وآراءنا باقية، وما عم تِستفِيدوا شي، غير إنّكُن تبَيّنوا عا حَقيقِتكُن إنّو بورنييييييييه وكتير! إعمِلوا مِتلي، أنا مثلاً تلات إربَاع أصحَابي قوّات بتِتْخَايَلوا؟ وبحِبّن من نص دين قلبي، وما بِطلع عنُنْ والسما زرقا، بس ما بطيق آراؤن بالسياسة وبالبلد وبالتَنَوُّع وبِ وبِ وبِ، خاصَّةً هالإيّام! إنّو طبيعي يكونوا مع الشَيطان بحَدْ ذاتو؟ معقول يكونوا مصدّقين إنّو اللي صَلبُوا المسيح جَايِين يسدُولُن خِدمة!؟
َولَو!! أساساً كيف فيهُن يكونوا هلقد مِش مِعنيّين باللي عَم يصير بالجنوب؟ يا جماعة هاي أرضنا وبيوتنا وزرعنا وزيتوناتنا وناسنا ولك شو بِكُن؟ أنا مش عم دافع عن حزب الله بس بِمَطرح ما في غيرو عم يدافِع عن أراضينا ما بدّكن تِعتِرفُولو فيها كمان؟ عم يدافِع عنّكن تفضّلوا شَمِّروا وتوجّهوا للدِفاع عن الجنوب! شه! ولك فِي مسيحيّة بالجنوب عارفين؟ هول شو طالعين عنُنْ كمان؟ وإلا مِعتقدِينُن أعداء!؟ هُول حزب الله عم يدافِع عنُن عارفِين؟
بِرجَع بكَرّر منّي مع حزب الله وإلي كتير مَآخِذ.. ومنّي أبداً مع القوّات بتاتاً، كِشْ برّا وبعِيد
ومنّي مع حدا نهائياً، انا مع لبنان ونقطة نهائيّة وما بَعدا سَطر.. غير سَطْر النَمِل.
مفَادُو في رأي ورأي آخَر شكراً
هلق للهبل اللي عم يِتسِاءَلوا إنّو كيف ريما هلّق عم تِحكي هيك عن عبد الغني، وكانت بالماضي هاجمة عليه! هاي الغَشْمَنة بحَد ذاتا للصراحة.
أوّل شي نَبذة عامّة بتِنفَع لهَالموضوع ولغَيرو
اللي ما بيِتطَوَّر الله لا يرِدُّو
تانياً انا ما بِقلُب مِن مَيْل لمَيْل ما الخَيْل البَيضَا تحَيِّينا من مَيل لميْل
يا جماعة الخَير وتعاليم المَسيح كِلا بتِحكِي عن المُسامَحة والغُفران والقلُوب البَيْضا شو بِكُنْ!!! هيدا المسيح الحَقيقي الكامِل أكيد مِش الصَليب المَشطُوب يِه يِه يِه يا ربّي تنغّينا.
تالتاً أنا من الأساس بحِبّو لعبد الغني وذَكَرِت ليه حتّى إيّام ما كنت إهجُم عليه كنت إعتِرفلو بصداقتو مع أبي وضل قول بِستَغرب كيف منَيّمها بس انتو ما بتقروا منيح!!
وعبد الغني في فَترة زمنيّة كان عم يردّد موّال التانيين، بكل بساطة لأن ما كان سامِع موّالنا تا يعرِف يِحكُم صَح! فا لِحقو طرطوشة مع التانيين وأبواقُن إنّما تا تِفهَموا كيف بتصير التحوّلات، مرّة فايتة عا صَفحتي إيّام ما كِنت إقرأ كل التَعليقات وجاوِب عا كل التعليقات، بشوف حدا كاتب ريما عجّلي شُوفي عبد الغني شو كاتب عا صفحتو، ركضِت إفتراضيّاً متل السهم الراجع، عا صَفِحتو شَكْ، وسيفٌ فليُشهَر، وفتحت البوست وقريتو!! العَمَى ما في هُجوم إلا عليّي انا شَخصِي، وهاي مفهومة، ومقبولة، أمّا عن فيروز مكتوب شي، من أجمل ما كُتب عنها!! عفواً يعني إذا بِحتِرم حالي، وانا أَحتَرِم حالي كتير، وإذا بِحتِرم الرسالة وحِبْر الرِسالة ما فيني ما إنحِنِي قدّام اللي قريتو وصاحب القَلَم اللي كَتَب. وعلَّقت وَقتا نسيت شو بالتفصيل بس نقلِت الحقيقة إنّو كنت جايي بخلفيّة القتال وتفاجئت إيجاباً بِ نص رائع رُغم بَعض المُغالطات.. ودغري وفوراً عادت المياه لمجاريها، رُغم إنّو كان سابِبْني بالمقال، بس شو هَمْ انا بدّي آكُل عِنب ما بدّي إقتُل الناطور! ولَلحقيقة طِلع كتير أكبَر منّي بشغلة، مِحِي فوراً كل بوستاتو اللي مالِشنِي فيها، أمّا انا لَم أفعَل ولَنْ أفعل، لسبب كتير بسيط إنّو بوستاتي كانوا موجَّهين لغَير ناس وهو ساقَبِت قاعِد عم يشرَب قهوة بكل براءة معُن. فا إرتَحتِي يا جِدّي!!؟
اوف شو عاد طلع طويل هالبوست!! ما كان مبيّن عليه هيك!!!
ريما عاصي فيروز زياد هلي ليال الرحباني
 

---